Depresioni klasifikohet si një çrregullim i humorit. Ai mund të përshkruhet si një ndjesi trishtimi, humbjeje ose zemërimi që ndërhyn në aktivitetet e përditshme të një personi.
Depresioni është mjaft i zakonshëm. Njerëzit e përjetojnë depresionin në mënyra të ndryshme. Ai mund të ndërhyjë në punën tuaj të përditshme, duke rezultuar në humbje kohe dhe produktivitet më të ulët. Po ashtu, depresioni mund të ndikojë në marrëdhëniet tuaja dhe tek disa kronike.
Problemet shëndetësore që mund të përkeqësohen për shkak të depresionit përfshijnë:
- Artriti
- Astma
- Sëmundje kardiovaskulare
- Kanceri
- Diabetit
- Obeziteti
Është e rëndësishme të kuptoni se të ndjehesh i dëshpëruar ndonjëherë është një pjesë normale e jetës. Ngjarje të trishtueshme dhe shqetësuese u ndodhin të gjithëve. Por nëse ndiheni rregullisht të dëshpëruar ose të pashpresë, mund të jeni duke u përballur me depresionin. Depresioni konsiderohet një gjendje e rëndë mjekësore që mund të përkeqësohet pa trajtimin e duhur.
Simptomat e depresionit
Depresioni mund të shkaktojë një sërë simptomash, të cilat mund të ndikojnë në disponimin tuaj dhe të tjera ndikojnë në trupin tuaj. Simptomat gjithashtu mund të jenë të vazhdueshme ose të vijnë e të shkojnë.
Jo të gjithë personat me depresion do të përjetojnë të njëjtat simptoma. Simptomat mund të ndryshojnë në ashpërsi, shpeshtinë dhe kohëzgjatjen e tyre.
Nëse përjetoni disa nga shenjat dhe simptomat e mëposhtme të depresionit pothuajse çdo ditë për të paktën 2 javë, ju mund të jeni me depresion:
- Ndjeheni të trishtuar, të shqetësuar ose “bosh”
- Ndjeheni të pashpresë, të pavlerë dhe pesimistë
- Qani shumë
- Jeni të mërzitur ose të zemëruar
- Keni humbur interesin për aktivitetet dhe interesat që dikur ju pëlqenin
- Keni ulje të energjisë ose lodhje
- Keni vështirësi në përqendrim, kujtesë ose në marrjen e vendimeve
- Lëvizni ose flisni më ngadalë
- Keni vështirësi për të fjetur, për t’u zgjuar herët në mëngjes ose flini më tepër seç duhet
- Keni probleme me oreksin ose ndryshime në peshë
- Keni dhimbje fizike kronike pa shkak të qartë që nuk përmirësohet me trajtim (dhimbje koke, probleme me tretjen, ngërçe)
- Keni mendime rreth vdekjes, vetëvrasjes, lëndimit të vetes ose tentativave për vetëvrasje
Shkaqet e depresionit
Ka disa shkaqe të mundshme të depresionit. Ato mund të variojnë nga shkaqe biologjike në ato rrethanore.
Shkaqet më të zakonshme përfshijnë:
- Kimia e trurit. Mund të ketë një çekuilibër kimik në pjesët e trurit që menaxhojnë gjendjen, mendimet, gjumin, oreksin dhe sjelljen tek njerëzit që kanë depresion.
- Nivelet e hormoneve. Ndryshimet në hormonet femërore të estrogjenit dhe progesteronit gjatë periudhave të ndryshme kohore, si për shembull gjatë ciklit menstrual, periudhës pas lindjes, perimenopauzës ose menopauzës mund të rrisin rrezikun e depresionit.
- Historia familjare. Ju jeni në një rrezik më të lartë për të zhvilluar depresion nëse keni familjarë me depresion ose një çrregullim tjetër të humorit.
- Trauma në fëmijërinë e hershme. Disa ngjarje ndikojnë në mënyrën se si trupi juaj reagon ndaj frikës dhe situatave stresuese, duke u bërë shkak për depresionin.
- Struktura e trurit. Ekziston një rrezik më i madh që të keni depresion nëse lobi frontal i trurit tuaj është më pak aktiv. Megjithatë, shkencëtarët nuk e dinë nëse kjo ndodh para ose pas fillimit të simptomave të depresionit.
- Probleme mjekësore. Sëmundjet kronike, pagjumësia, sëmundja e Parkinsonit, goditjet në tru, infarktet në zemër dhe kanceri mund të rrisin shanset që një person të ketë depresion.
- Përdorimi i substancave. Një histori keqpërdorimi të substancave narkotike ose alkoolit mund të ndikojë në rrezikun tuaj që të zhvilloni depresion.
- Dhimbje. Njerëzit që ndiejnë dhimbje fizike emocionale ose kronike për periudha të gjata kohore kanë shumë më shumë gjasa të krijojnë depresion.
Trajtimi për depresionin
Ju mund të menaxhoni me sukses simptomat e depresionit duke ndjekur një formë trajtimi që ju përshtatet më mirë.
Alternativa trajtimi për depresionin përfshijnë:
Medikamente
- Frenuesit selektivë të rimarrjes së serotoninës (SSRIs)
- Frenuesit e rimarrjes së serotoninës dhe norepinefrinës (SNRI)
- Antidepresantë triciklik dhe tetraciklik
- Frenuesit e rimarrjes së noradrenalinës dhe dopaminës (NDRIs)
- Frenuesit e monoaminë oksidazës (MAO)
- Antagonistë N-metil D-aspartat (NMDA)
Psikoterapia
- Terapia konjitive e sjelljes (CBT)
- Terapia e sjelljes dialektike (DBT)
- Terapia psikodinamike
Terapitë alternative
Pyesni mjekun tuaj për terapitë alternative që mund të ndiqni për depresionin. Shumë njerëz zgjedhin të përdorin terapi alternative krahas psikoterapisë tradicionale dhe mjekimit. Disa shembuj përfshijnë:
Meditim. Stresi, ankthi dhe zemërimi janë shkaktarë të depresionit, por meditimi mund të ndihmojë në ndryshimin e mënyrës se si truri juaj reagon ndaj këtyre emocioneve. Studimet tregojnë se praktikat e meditimit mund të ndihmojnë në përmirësimin e simptomave të depresionit dhe të ulin shanset për një rikthim të tij.
Akupunkturë. Akupunktura është një formë e mjekësisë tradicionale kineze që mund të ndihmojë në lehtësimin e disa simptomave të depresionit. Gjatë akupunkturës, një praktikues përdor gjilpëra për të stimuluar zona të caktuara në trup në mënyrë që të trajtojë një sërë kushtesh.
Këshilla për mënyrën e jetesës për personat me depresion
Kryeni aktivitete fizike
Synoni të bëni aktivitet fizik për 30 minuta 3 deri në 5 ditë në javë. Aktiviteti fizik mund të rrisë prodhimin e endorfinës në trup, të cilat janë hormone që përmirësojnë gjendjen tuaj.
Shmangni përdorimin e alkoolit dhe substancave narkotike
Pirja e alkoolit ose keqpërdorimi i substancave narkotike mund t’ju bëjë të ndiheni më mirë për pak kohë. Megjithatë, në plan afatgjatë, këto substanca mund të përkeqësojnë simptomat e depresionit dhe ankthit.
Mësoni si të vendosni kufij
Ndjenja e mbingarkesës mund të përkeqësojë simptomat e ankthit dhe depresionit. Vendosja e kufijve në jetën tuaj profesionale dhe personale mund t’ju ndihmojë të ndiheni më mirë.
Kujdesuni për veten
Simptomat e depresionit mund të përmirësohen duke u kujdesur për veten. Kjo përfshin gjumin e rregullt, një dietë të shëndetshme, shmangnien e njerëzve negativë dhe pjesëmarrje në aktivitete të këndshme.
